https://www.facebook.com/events/446633825435029/?fref=ts

Vit takk øllum sum komu at hoyra upplestur á G! 2013. Har lósu Sissal Kampmann, Vónbjørt Vang og Daniella Andreassen og onnur. Eg nevni hesar, tí tær allar eru útkomnar á Forlaginum Eksil. Annars lóru Oddfríður M. Rasmussen, Jóanes Nielsen og onnur.

Á Ólavsøku var aftur upplestur. Har lósu høvundar sum Carl Jóhan Jensen, Jóanes Nielsen, Sissal Kampmann, Vónbjørt Vang, Kim Simonsen og nógv onnur.

<iframe width='640px' height='380px' frameborder='0' scrolling='no' marginwidth='0' marginheight='0' src='http://media.ruc.dk/2012-12-10_1/iframe.html'></iframe>

Tíðindaskriv frá forlagnum EKSIL

Útgávureseptión av nýggjum yrkingasavni eftir Sissal Kampmann

Leygardagin 09.06.12 kemur nýtt yrkingasavn eftir Sissal Kampmann út á forlagnum EKSIL. Yrkingasavnið, við heitinum, Endurtøkur,  er annað savnið eftir høvundan. Fyrsta savnið, Ravnar á ljóðleysum flogi – yrkingar úr uppgongdini, kom í 2011.

Endurtøkur leggur seg upp at fyrra savninum, við tað at tað er ein leinging av nøkrum av teimum evnunum í vóru viðgjørd í Ravnar á ljóðleysum flogi.  Formurin er tó ein annar, tí í nýggja savninum eru fleiri prosakendir tekstir enn í tí fyrra, ið bert vóru yrkingar. Kápumyndina á Endurtøkum eigur Ludvík Breckmann, eins tí á fyrra savninum.

Í samband við yrkingasavnið kemur út, skipar EKSIL fyri tiltaki í Føroyahúsinum, har m.o. Dennis Agerblad, Mai Øvlisen, Marita Dalsgaard, Ludvík Breckmann v.fl. fara at lesa upp og spæla tónleik.

Tiltakið, ið er ókeypis, verður frá kl. 16.00 – 20.00 í Føroyahúsinum, Vestebrogade 17A.

MILLUMLENDINGAR yrkingar Vónbjørt Vang

MILLUMLENDINGAR – nýtt yrkingasavn eftir kvinnuligan debutant

42 síður * 140 kr * Kápumynd og uppseting Lena Nicolajsen

Savnið ”Millumlendingar” hjá Vónbjørt Vang (f. 1974) opnar seg sum ein floymandi, uppreksandi myndagerð, har rúmið verður víðkað við longsli og nærveru. Stílurin er spælandi og ironiskur. Málið er modernað og nærum provokerandi óhátíðarligt.

Evnið í hesum yrkingum er um at finna heim, flytingar, um ikki at festa røtur. At royna at festa røtur. Endurkomandi myndir eru fráferðin og heimferðin, tíð, spor og minnir. Sjónin og navngeving stýra hesum yrkingum, tað neyva gerandisliga, tað vanliga og banala hava høvuðsleiklut. Savnið er sum ein fortættaður og tematiskur abstraktur ringur ella umferð av evnum, sum tosa saman, ið arbeiða seg smakkandi og sansandi rundan um tað ósagda og tað ósigiliga.

Skelkandi bók

Dilemma

140 kr * Kápumynd Daniella Andreasen * Uppseting Lena Nicolajsen

Daniella Andreassen debuterar við hesi nýskapandi prosabókini sum upprunaliga er sprottin úr eini bloggfrásøgn. Bókin er um eina unga føroyska kvinnu sum sjálvstilvitað og við stórum dirvi sigur frá síni søgu sum ein føroysk skrivandi kvinna í 21. øld.

Sum verk er bókin samansett, bæði málsligt og innihaldsligt. Her eru innantanna einarøður, frásagnir, dialogar og yrkingar. Bókin er í sjey pørtum, sum kunnu minna um eina skrivaða dagbók í sjey dagar. Gerandisliga málið og blandaða málið, sum í støðum ikki himprast fyri respektleyst at skifta frá føroyskum til danskt er sum málburðurin annars ein mynd av kreppuni ella tí dilemma sum persónurin sum sigur frá er í. Sum ein av teimum 2500 ungu kvinnum sum mangla í Føroyum. Meiri í ætt við Victoriu Wild, Silviu Henriksdóttir enn Heðin Brú.

Ravnar á ljóðleysum flogi – yrkingar úr uppgongdini yrkingasavn Sissal Kampmann

Ravnar á ljóðleysum flogi – yrkingar úr uppgongdini

84 síður? * 140 kr * Kápumynd Ludvík Breckmann * Uppseting Janus Kampmann

Sissal Kampmann debuterar við savninum “Ravnar á ljóðleysum flogi – yrkingar úr uppgongdini”. Fyrsta yrkingin í savninum sendir okkum beinleiðis inn í ein heim, har ein ferð móti eini nýggjari byrjan og endin á eini farnari tíð arbeiða framm ímóti hvørjum øðrum í eini ringrás, fyri at enda at røkka saman. Men áðrenn endarnir røkka hvør ørðum, skal søgan um alt tað, ið liggur ímillum sigast.